ಆಸೆ

 ಓ ಗಡಿಯಾರದ ಮುಳ್ಳುಗಳೇ....

                ನಿಮ್ಮಂತೆ ನಾನಾಗಬೇಕೆಂಬ ಆಸೆ!

                 ಖಿನ್ನತೆಯ ಜಾಡಲ್ಲಿ, ಆಲಸ್ಯದ ಗೂಡಲ್ಲಿ 

                 ಗುಬ್ಬಿಮರಿಯಾಗಿರುವ ನನಗೆ 

                 ಕ್ಷಣಕಿರುವ ಮಾನ್ಯತೆಯ, ಕಾಯಕದ ಔನ್ನತ್ಯವ 

                 ನಿದರ್ಶಿಸಿರುವೆ ನೀನು....

ಓ ಶ್ವೇತ ಹಂಸಗಳೇ....

                ನಿಮ್ಮಂತೆ ನಾನಾಗಬೇಕೆಂಬ ಆಸೆ!

                ನಿರ್ಲಿಪ್ತ ನೀರಲ್ಲಿ ನಿಮ್ಮ ಚಲನೆ,

                ನೋಡುಗನಿಗೆ ಸಖ್ಯ, ಕಣ್ಣಿಗದು ಆಹ್ಲಾದ 

                ಅದರಡಿಯ ನಿಮ್ಮ ಸತತ ಪರಿಶ್ರಮ 

                ಯಾರಿಗದು ವೇದ್ಯ? ನನಗದುವೆ ಪ್ರಚೋದನೆ....

ಓ ಧುಮ್ಮಿಕ್ಕೋ ಜಲಧಾರೆ......

                 ನಿಮ್ಮಂತೆ ನಾನಾಗಬೇಕೆಂಬ ಆಸೆ!

                 ತನ್ನದೆಂಬ ನಿರ್ದಿಷ್ಟ ಪರಿಧಿಯ ತೊರೆದು 

                 ತನ್ನಿಕ್ಕೆಲವ  ಹಸಿರಾಗಿಸಿ, ಜುಳ ಜುಳನೇ ಹರಿಯೋ ಜಲರಾಶಿ 

                 ಎಲ್ಲ ಎಲ್ಲೆಗಳನು ಮೀರಿ ತನ್ನ ತನವ ಛಾಪಿಸುತ 

                 ವ್ಯಕ್ತಿಗತವಾಗಿ ಬೆಳೆಯಬೇಕೆಂಬಾಸೆಗೆ, ನೀನಾಗಿರುವೆ ನೀರು....